Ավագ դպրոցի տնօրեն Զ. Ղալթախչյանի ելույթը վերջին զանգի արարողության ժամանակ

214Բարի երեկո,  հարգելի՛ հյուրեր, հարգելի՛պարոն Ալիխանյան

 

Շատ սիրելի՛ գործընկերներ

 

Ուզում եմ հիմա  գործընկեր բառով դիմել ոչ միայն  ճեմարանի անձնակազմին ու ծնողներին,, այլ նաև  մեր երեկվա աշակերտներին և այսօրվա շրջանավարտներին:

 

Սիրելի՛ գործընկերներ

 

2016 թվականի մայիսը սովորական չէ. դրան նախորդել է ապրիլը՝ քառօրյա պատերազմով և լույս դարձած երիտասարդների հիշատակով: Այս տարի շատ դպրոցներում վերջին զանգի արարողություն չեղավ.  հիշատակի օր եղավ:

 

Իսկ մեր ճեմարանը նշում է, նշում է, և արդար չի լինի, եթե մոռանանք այն սուրբ տղաներին, որոնք իրենց կյանքը տվին, որ այսօր մենք կարողանանք տոնել  վերջին զանգը:

 

Խնդրում եմ՝ եկե՛ք մեկ րոպե լռությամբ հարգենք այն տղաների հիշատակը, ովքեր ընկան, որ մեր զավակները կարողանան ապրել, դպրոց ավարտել և տոն ունենալ:

 

Շնորհակալություն:  Նստե՛ք խնդրեմ:

 

Սիրելի՛ գործընկեր ծնողներ, աչքներս լույս, մեր զավակները կյանք են մտնում: Նրանցից ամեն մեկը մի ողջ տիեզերք է ամփոփում իր մեջ: Նրանցից ամեն մեկը մի նոր գույն է տալու այս հին աշխարհին, մեր հայրենիքին:

 

Դուք, ավելի ստույգ՝ մենք  շատ երազներ ունենք նրանց հետ կապված. թող կատարվեն մեր և ձեր բոլոր երազանքները, թող իրականան նրանց  պատանեկական ամենախենթ ցանկություններն անգամ:

 

Մաղթում եմ նաև, որ նրանք լինեն  ներդաշնակ և կենսուրախ, տոկուն և առույգ, որ կարողանան հաղթահարել կյանքի ցանկացած խոչընդոտ:

 

Մաղթում եմ նաև, որ մենք միշտ կարողանանք արձանագրել, որ իզուր չենք ապրել, իզուր չենք պայքարել, չարչարվել և տքնել, որ նրանք լինեն երջանիկ և հաջողակ:

 

Այսօր հատուկ հպարտությամբ և շնորհակալության զգացումով եմ ուզում դիմել Միջազգային բակալավրիատի դիպլոմային ծրագիրն ավարտող մեր սաների ծնողներին: Երախտապարտ եմ, որ վստահեցիք մեզ,  ճեմարանի մեր ողջ թիմին, որ ընտրեցիք և ձեր զավակների համար հնարավորություն ստեղծեցիք անցնելու այս բարդ ու դժվարին, բայց նաև անչափ հետաքրքիր  ճանապարհը:

 

Ես չեմ վախենում և վստահորեն հայտարարում եմ, որ մենք մեր զավակներով միշտ ենք հպարտանալու. շնորհակալություն, սիրելի՛ ծնողներ ճեմարանի կողքին, ճեմարանի հետ լինելու համար:

 

Շնորհակալություն, սիրելի՛ գործընկեր սաներ, ձեր վառվռուն նկաարգրով մեզ վարակելու, մեզ ստեղծագործական վերելքների մղելու, մեր կյանքը զարդարելու  համար:

 

Ողջունում եմ մեկ անգամ էլ, շնորհավորում եմ և մաղթում ամենայն բարիք…

Ավագ դպրոցի տնօրեն Զ. Ղալթախչյանի ելույթը վերջին զանգի արարողության ժամանակ