Իրական և նորարար գաղափար՝ ՀԱՍԿ

Բնապահպանություն…Ընկերասիրություն… Մարտահրավերներ… Անքուն գիշերներ… Նոր գիտելիքներ… Հավատ սեփական ուժերի նկատմամբ… Եվ ուժեղ թիմ…

 

Ուրիշ որտե՞ղ կարող էին աշխարհի այսքան հրաշալիքները միավորվել, եթե ոչ Ճեմարանում, եթե ոչ յուրօրինակ նորարարական գաղափարի շուրջ և միջազգային մրցույթի շրջանակներում:

 

Անետան, Արմինեն, Էլինան, Անահիտը և Անին անցկացրել են երեք բուռն աշխատանքային ամիսներ ուսուցիչ Անի Սիրեկանյանի գլխավորությամբ և այս ամենը հանուն ՀԱՍԿ-ի գաղափարի:

Ի՞նչ է ՀԱՍԿ-ը: Մի տարում 500 միլիարդ պլաստիկ շիշ է օգտագործվում, որն առնվազն 500-1000 տարում կարող է մաքրվել բնությունից: Տարեկան ավելի քան 20,000 կմ2 տարածքի ծառեր են հատվում թուղթ ստանալու համար: Եվ ու՞ր կհասցնի այս ամենը մարդկությանը, չես կարող իմանալ: Այս թվեր կրճատելու և խնդրին ինչ-որ չափով լուծում տալու համար մեր ճեմարանական թիմը ստեղծել է ՀԱՍԿ-ի հեռախոսային հավելվածը, որը ծառայելու է երեք հիմնական ճյուղերով.

  1. հնարավորություն տալ մարդկանց նշելու իրենց իմացած աղտոտված տարածքները` կանչելով ՀԱՍԿ-ի կամավորներին, ովքեր կհավաքեն տարածքը,
  2. վերամշակել պլաստիկե և թղթե իրերը և վաճառել ստացվածները հավելվածի միջոցով` գումարի որոշ մասն օգտագործելով ծառեր տնկելու համար,
  3. ՀԱՍԿ-ի ստեղծարար թիմի դասընթացներից հետո` հնարավորություն տալ մարզերի բնակչությանը վաճառել իրենց կողմից վերամշակած ապրանքը մեր հավելվածի միջոցով:

Այս ամենը սկզբնական փուլում, իսկ թիմի գերնպատակներից մեկն է ստեղծել փոքրիկ լաբորատորիա պրոֆեսիոնալ վերամշակման սարքերով, որոնք կլինեն էկոլոգիապես մաքուր և թույլ կտան հնարավորինս շատ իրերի երկրորդ շունչ պարգևել՝

առաջխաղացնելով վերամշակման մշակույթը Հայաստանում և դրա սահմաններից դուրս: Մեր թիմն այս գաղափարի շնորհիվ գրավեց 2-րդ տեղը Technovation միջազգային մրցույթի Հայստանյան փուլում: Բայց դա դեռ միայն սկիզբն է և մենք մոտիվացված ենք զարմացնելու նորանոր հաջողություններով: Շատ շուտով մեր հավելվածը հասանելի կլինի Play Store-ում, իսկ մինչ այդ միացեք մեզ ֆեյսբուքում և հետևեք մեր նորություններին:

Էլինա Հովակիմյան

Իրական և նորարար գաղափար՝ ՀԱՍԿ