Հայրենի´ք արդար, արևի´ երկիր, դարերի մեջ հին,

Բարձր լեռները շուրջպար բռնած, ինչպես քոչարին.

Հայոց գրերը՝ խաչքարերին, անցյալի մասին.

Հայրենի´ երկիր, հարազա´տ  օջախ, հայրենի´ք անգին:

Հայրենի´ք արդար, հաղթական բանակ` հզոր և ուժգին.

Դժվար է անցել դարերի միջով քո փառքի ուղին:

Հպարտ հայացքով նայենք մոլոր աշխարհին,

Դառնանք մեկ բռունցք, հայրենի կանչով հույս տանք զինվորին:

Հայրենի´ք արդար,աստծո աղոթքով փառք հերոսներին,

Շատերի համար գարուն էր վերջին, կյանքը` հավերժին,

Ուր սերը, ինչպես անավարտ նոր երգ, լռեց շուրթերին,

Եվ լուսաբացները,  ինչպես մայրամուտ  մարեց աչքերին:

Հայրենի´ք արդար, ինչպես պայծառ լույս քո ժողովրդին,

Եվ փառք ու պատիվ հերոսների բոլոր մայրերին,

Որոնց սրտերը, ինչպես որբացած կարոտ, մնաց սահմանին,

Եվ արցունքները, ինչպես չորացած կաթիլ, ձուլվեց այտերին:

 

Հայրենի´ք արդար, դա մեր երկիրն է հոգսերով նորին,

Թեկուզ վխտում է պատերի տակին անկոչ վայրենին.

Ճակատագիր է, չենք կարող փոխել բութ հարևանին,

Բայց անկոտրում է զինվորի ոգին, մի´շտ զսպելու է անգութ ոսոխին:

 

Սիրով՝ հայրենիքի զինվոր Վիկտոր Սումբաթյան

Նկարների հեղինակ  Վիկտոր Սումբաթյան