«Ռաունդ Սքվեր»

Ի՞նչ է «Ռաունդ Սքվեր»-ը

 

«Ռաունդ Սքվեր»-ը 5 տարածաշրջանների 50 երկրներում 182 նորարական  դպրոցների միջազգային ասոցիացիա է, որը բացի ուսման ակադեմիական առաջադիմությունից, կարևորում է նաև անհատի ձևավորումն ու զարգացումը:

 

«Ռաունդ Սքվեր» կազմակերպության առաքելությունն է.

Բացի ուսման ակադեմիական առաջադիմությունից` անհատի ձևավորումն ու զարգացումը իրականացնել միջազգային մտածողության (ինտերնացիոնալիզմի), ժողովրդավարության (դեմոկրատիայի), շրջակա միջավայրի պահպանման, հոգու և մարմնի կերտման (խիզախության ), առաջնորդելու և հանրությանը ծառայելու  սկզբունքների միջոցով:

 

«Ռաունդ Սքվեր» կազմակերպության նպատակն է.

Աշխարհի տարբեր երկրների սաներին այնպես ոգևորել, որ նրանց սերունդը սկսի պայքարել և ապրել նոր գաղափարներով, կյանքի ընկալման նոր սկզբունքներով և միմյանց հասկանալու և միմյանց հետ համագործակցելու նոր ձևերով:

 

«Ռաունդ Սքվեր» կազմակերպության մասին

«Ռաունդ Սքվեր»-ը  միջազգային դպրոցների համաշխարհային ասոցիացիա է, որը ստեղծվել է 1967թ.-ին  գերմանացի փիլիսոփա Կուրտ Հանի առաջադրած սկզբունքների հիման վրա: Կուրտ Հանի խորին համոզմամբ «դպրոցները ոչ թե պարզապես կրթական հաստատություններ են, այլ վայրեր, որտեղ հնարավոր է ստեղծել սաներին կյանքին պատրաստելու բոլոր նախադրյալները»:

 

Կուրտ Հանի կարծիքով, սաները կարող են կյանքը լավ հասկանալ միայն հետաքրքիր և արկածային կյանքի փորձ անցնելուց հետո: Այս կերպ նրանք կարող են ստուգել իրենց խիզախության, մեծահոգության, երևակայության, սկզբունքայնության ու որոշումներ ընդունելու ունակության աստիճանը: Այս ամենից հետո նրանք կզարգացնեն իրենց մեջ ապագա առաջնորդին վայել հմտություններ և ունակություններ:

 

«Յուրաքանչյուր  երիտասարդ աղջիկ կամ տղա  ունակ է հայտնաբերելու իր ներքին ուժը  և պատրաստ է ընկալելու շրջակա աշխարհում կատարվող երևույթները. պարզապես  անհրաժեշտ  է նրանց ճիշտ ուղղորդել և համապատասխան հնարավորություններ ընձեռել»:

 

Կուրտ Հանը վստահ էր, որ կարեկցանքը  կարևորագույն  հատկանիշներից է, որ մարդ  ընդունակ է ձեռք բերելու  իր կյանքի ընթացքում: ՌՍ-ի  գաղափարախոսությունը որդեգրած դպրոցները համախմբում  և ոգևորում են իրենց սաներին, որպեսզի նրանք  դառնան  կարեկցող առաջնորդներ:

 

Աշխարհը, որտեղ մենք ապրում ենք,  շատ արագ է փոխվում: Եթե այսօր աշակերտներն ուզում են հաջողության հասնել, միայն ակադեմիական առաջադիմությունը և քննություններ հանձնելը  բավարար չեն: Դպրոցները պիտի ավելի լայն գաղափար որդեգրեն: Այն է` առաջնորդվել «Ռաունդ Սքվեր»-ի  առաջադրած սկզբունքներով:

 

Այս սկզբունքները ընդունել են կրթությամբ մտահոգ շատ հայտնի մարդիկ:  Եվ իզուր չէ, որ ՌՍ կազմակերպության հոգաբարձուներն են այնպիսի հանրահայտ մարդիկ, ինչպիսիք են` Հունաստանի Կոնստանտին 2-րդ թագավորը, Յորքի արքայազն Էնդրյուն (Մեծ Բրիտանիա), պետական ու քաղաքական նշանավոր գործիչներ Նելսոն Մանդելան և Սոնյա Գանդին, Միջազգային օլիմպիական կոմիտեի  փոխնախագահ Կևին Գոսպերը, երեխաների իրավունքների պաշտպան Քրեյգ Կեյլբուրգերը:

 

ՌՍ գաղափարախոսության հիմքում ընկած են հետևյալ 6 սկզբունքները/ 6 IDEALS

  • Internationalizm / ինտերնացիոնալիզմ (միջազգային մտածողություն)
  • Democracy / ժողովրդավարություն
  • Environmentalizm / շրջակա միջավայրի պահպանություն
  • Adventure / հոգու և մարմնի կերտում (խիզախություն)
  • Leadership / առաջնորդություն 
  • Service / ծառայություն հանրությանը

  

Ինտերնացիոնալիզմ (միջազգային մտածողություն)

ՌՍ-ը հնարավորություն է տալիս աշխարհի բոլոր սանրին հանդիպելու տարբեր մարդկանց, ովքեր  ունեն այլ մտածողություն,  տարբեր կարծիքներ ու համոզմունքներ: Նման մարդկանց հետ հանդիպելը կօգնի սաներին ընդլայնելու  մտահորիզոնը, ինչպես նաև կարողանալ  ընդունել  իրենց կարծիքից տարբերվող  այլ  կարծիքներ:

 

Հասկանալ մարդկանց մտածելակերպը հաջողակ և կարեկցող առաջնորդի հատկություն է:

 

Դեմոկրատիա  (ժողովրդավարություն)

Դեմոկրատիայի հիմքում ընկած է հետևյալ սկզբունքը`  յուրաքանչյուրին իր կարծիքը արտահայտելու  հնարավորության տալ` համոզված լինելով, որ բոլորի կարծիքները նույն կշիռն ունեն: Սաներին հնարավորություն կտրվի հասկանալու, որ ուրիշների կարծիքն էլ նույնքան կարևոր և հավասար է, որքան իրենց սեփականը:

 

Ուրիշ մարդկանց կարծիքը հարգելու ունակությունը օգնում է սաներին լինելու կարեկցող, մարդասեր և հասկացող:

 

Շրջակա միջավայրի պահպանություն

ՌՍ-ի անդամ դպրոցները փորձում են մոլորակի վրա, որքան հնարավոր է քիչ վատ ազդեցություն ունենալ: Նրանք կարծում են, որ բնության մի մասն են և իրենց չեն առանձնացնում բնությունից: Սաները սովորում են, թե իրենք ինչ ազդեցություն կարող են ունենալ բնության վրա և ինչպես այդ ազդեցությունը հնարավորինս նվազեցնեն:

 

Հասկանալով, որ այս մոլորակում ապրում են  ոչ միայն իրենք, այլև կենդանի այլ  արարածներ` սաները  պատասխանատվությամբ են լցվում շրջակա միջավայրի պահպանության հանդեպ:

 

Հոգու և մարմի կերտում(խիզախություն)

Երբ սաները մագլցում են սարերը, նրանք պարզապես  բարձունքների հաղթահարման  հմտություններին չեն տիրապետում, այլ կարողանում են հասկանել, թե ինչ ուժի են իրենք տիրապետում, ինչպես հաղթահարեն իրենց վախերը և ինչպես ոգևորեն և օգնեն ուրիշներին:

 

Յուրաքանչյուր տեսակի գործունեություն, որը պահանջում է խիզախություն, դժվարությունների հաղթահարում, շատ լավ միջոց է ինքնաճանաչման  համար:

 

ՌՍ-ը հավաստիացնում է, որ սաները ունեն ժամանակ և տարածք` ներգրավվելու տարբեր տեսակի գործողությունների մեջ և ընձեռնում է այդպիսի հնարավորություններ: Սպորտի միջոցով նրանք կարող են հասկանալ, թե ինչ են սովորել և այլ մարդկանց ու շրջակա միջավայրի համար օգտակար դառնալ:

 

Առաջնորդություն

ՌՍ-ը  հնարավորություն է ընձեռում ցանկացած հարմար առիթի դեպքում (լինի դա խաղադաշտում, դասասենյակում, ճամփորդության ժամանակ կամ այլ գործունեության ընթացքում) առաջնորդելու ուրիշներին:

 

Միայն առաջնորդելու փորձի ընթացքում նրանք կարող են իմանալ,  թե ինչ առավելություններ ու թերություններ ունեն որպես առաջնորդ:

 

Սաներին առաջնորդելու հնարավորություն ընձեռելը օգնում է նրանց սովորել ընդունելու կյանքի բոլոր մարտահրավերները:

 

Ուրիշների հանդեպ կարեկցանքի զգացումն է, որ միացնում է աշխարհի հայտնի առաջնորդներին:

 

Ծառայություն հանրությանը

Ծառայություն նշանակում է մտածել դիմացինի մասին: Քանի որ այն հիմնված է կյանքի հանդեպ ունեցած վերաբերմունքի և մոտեցումների վրա, հարկավոր չէ աշխարհով ճանապարհորդել, որպեսզի իմանաս, թե ինչպես ծառայել ուրիշներին: Ծառայությունը այն է, թե ինչպես է մարդ ապրում  և ոչ թե ինչ է անում:

Ուրիշներին և շրջակա միջավայրին ծառայելը սանին դարձնում է կարեկցող:

 

ՌՍ ասոցիացիայի անդամ յուրաքանչյուր դպրոց իր սաներին առաջարկում է մեծ քանակությամբ ծառայության ծրագրեր, որպեսզի օգնեն սաներին սովորելու  ծառայել ուրիշներին: Սովորաբար այս ծրագրերը սաներին ստիպում են մի որոշ ժամանակ զուրկ մնալ հարմարավետությունից:

 

Նմանատիպ ծրագրեր դպրոցները կարող են առանձին-առանձին կազմակերպել կամ պարզապես միանալ իրենց տարածաշրջանի այլ դպրոցի հետ:

 

Կան ծրագրեր,  որոնք ավելի մեծ մասշտաբներ են ընդգրկում: ՌՍ ծառայության միջազգային ծրագրերը, համաժողովները, փոխանակման ծրագրերը   սաներին հնարավորություն են ընձեռում` ունենալու  միջազգային հետաքրքիր ու բազմազան կրթություն:

 

ՌՍ-ը իր մեջ ներառում է ավելի քան հարյուր դպրոց և  այլ երկրներ ու մշակույթներ ուսումնասիրելու, միջազգային ընկերություն հաստատելու և աշխարհի տարբեր երկրներում սովորելու առանձնահատուկ հնարավորություն է ընձեռում սաներին:

_____________________________________________________________________________________________________

2009 թ. հոկտեմբերից ճեմարանը դարձավ ՌՍ Հարավային Ասիա և Գալֆ տարածաշրջանային անդամ: Նույն ամսին ճեմարանի պատվիրակությունն իր առաջին մասնակցությունն ունեցավ  Հնդկաստանում կայացած ՌՍ համաշխարհային համաժողովին:

 

2010 թ. հոկտեմբերին Հունաստանի Կոնստանտին 2-րդ թագավորը ճեմարանին հանձնեց կազմակերպության դրոշը և լիիրավ անդամի վկայականը: Այսպիսով, «Շիրակացու ճեմարան» միջազգային գիտակրթական համալիրը  տարածաշրջանում առաջինը դարձավ «Ռաունդ Սքվեր» միջազգային դպրոցների համաշխարհային ասոցիացիայի լիիրավ անդամ: