Սիրելի՛ շրջանավարտներ

Երջանիկ ու հպարտ եմ ձեզնով, նաև վստահ եմ, որ առջևում ձեզ սպասում է հետաքրքիր ապագա՝ լի ստեղծագործական թռիչքներով: 

Վստահ եմ, որ ձեզանից ամեն մեկը գտնելու է իր նպատակներն իրագործելու արդար ճանապարհը: Հուսով եմ, որ մասնագիտության ընտրության հարցում ճիշտ կողմնորոշում ունեք և նախորդ շրջանավարտների օրինակով դառնալու եք հիանալի մասնագետներ, տվյալ մասնագիտական ոլորտի երախտավորներ: 

Իմ խորին համոզմամբ, լավ մասնագետ դառնալուց բացի, ավելի առաջնահերթ խնդիր ունեք, սիրելի՛ զավակներ:

Դուք պարտավոր եք նախ և առաջ նվաճել Մարդ կոչվելու ամենաբարձր ամրոցը: Դա կապված է բազում փորձությունների հետ: Սակայն, որքան էլ դժվար լինի այդ պայքարը, հիշե՛ք, որ թիկունքում ձեր Ալմա Մատր ճեմարանն է, որը ուժ և ոգի կհաղորդի ձեզ և թույլ չի տա սայթաքել: 

Ու նաև հիշե՛ք, որ ուր էլ լինեք, ինչ գլխապտույտ հաջողությունների էլ հասնեք, զավակներն եք մի ժողովրդի, որը դեռ շատ անելիքներ ունի, և որը արևի տակ դեռևս իրեն արժանի կյանքը չի կառուցել: Արժանավայել կյանքի կառուցողնե՛ր դարձեք, սիրելի՛ շրջանավարտներ: Ուզում եմ հոր իրավունքով պահանջել, որ կյանքում երբեք չխաբեք ինքներդ ձեզ, երբեք, ոչ մի պարագայում չկորցնեք ազնվությունն ու հարգանքը նախ և առաջ ինքներդ ձեր հանդեպ: Միայն այս դեպքում կարող եք դառնալ այն մտավորականը, որը իրավամբ կարող է համարվել իր ժողովրդի ընտրյալը: 

Թող Աստված օրհնի ձեր ճանապարհը, սիրելի՛ զավակներ: 

Ձեր՝ Աշոտ Ալիխանյան