2018 – Շիրակացու ճեմարան

Տարեգրություն

Մեր պատմությունը 2018 թ

Փետրվար
- Ճեմարանի թատերական ստուդիան արդեն 7-րդ անգամ դառնում է «Կանաչ մոլորակ» միջազգային ֆորումի դափնեկիր՝ Վիլյամ Սարոյանի «Իմ սիրտը լեռներում է» պիեսի բեմադրության համար (ղեկավար՝ Գարիկ Ղազարյան)։
- Տալլինում կայացած «STARTER tech Advanced Spring 2018» ստարտափ ծրագրի շրջանակում ճեմարանի քիմիայի ուսուցիչ, քիմիական գիտությունների թեկնածու, դոցենտ Սոֆյա Այդինյանի ղեկավարած հետազոտական խումբը հաղթողներից մեկն է Ճանաչվում «Կենսաբանական վառելիքը էներգիայի աղբյուր» թեման որպես բիզնես-նախագիծ ներկայացնելու համար:
Մարտ
- ՄԲ գրասենյակի կողմից երաշխավորված սեմինար է իրականացվում ճեմարանի ուսուցչության համար՝ «Ուսումնառության մոտեցումներ և կարողությունների զարգացում» թեմայով, սեմինարավար՝ Քրիս Ռայթ:
- Ճեմարանի պատվիրակությունը մեկնում է Արցախ, որտեղ իրականացվում են երգի, Ֆրանսերենի, կերպարվեստի և մնջախաղի վարպետաց դասեր:
- Ճեմարանի ֆրանսերենի ուսուցչուհի Արմինե Գևորգյանը Ֆրանկոֆոնիայի տոնի շրջանակում Արցախում՝ Ստեփանակերտում, վերապատրաստման դասընթացներ է վարում ֆրանսերեն դասավանդող ուսուցիչների հետ:
Ապրիլ
- Հանդիսավոր պայմաններում անցկացվում է 2017-2018 ուստարվա 10-րդ դասարանցիների անհատական նախագծերի ստուգատեսը:
- Մեկնարկում է Հայաստանի Հանրապետության և Մայիսյան հերոսամարտերի 100-ամյակին նվիրված տոնակատարությունների շարքը: Ճեմարան են այցելում ՀՀ Ազգային հերոս Արկադի Տեր-Թադևոսյանը (Կոմանդոս), փոխգնդապետ Անահիտ Մարտիրոսյանը «Վարդանանք» ռազմահայրենասիրական ակումբի ղեկավար Սաթենիկ Վարդանյանը և Ռուզաննա Կրպեյանը (ՀՀ Ազգային հերոս Թաթուլ Կրպեյանի քույրը):
- Ճեմարանի պատվիրակությունը (կրթահամալիրի տնօրեն Աշոտ Ալիխանյան և պատմության ուսուցչուհի Քրիստինե Սահակյան) Սոչիում մասնակցում է ԱՊՀ երկրների ՄԲ դպրոցների ամենամյա 12-րդ «ՄԲ դպրոցները մշտապես փոփոխվող աշխարհում» խորագրով համաժողովին: Համաժովին ելույթ է ունենում Քրիստինե Սահակյանը և ներկայացնում է ճեմարանի դիպլոմային ծրագրում «Ճանաչողության տեսություն» առարկայի դասավանդման առանձնահատկությունները:
Մայիս
- Ամփոփվում են հանրապետական առարկայական օլիմպիադաների արդյունքները: Օլիմպիադաներում հաղթում և դիպլոմներ են ստանում հետևյալ աշակերտները՝ Մարտիրոսյան Ծովինար (հայոց լեզու, 3-րդ կարգ), Հայրապետյան Մանե (անգլերեն, 1-ին կարգ), Հակոբյան Հռիփսիմե (գերմաներեն, 1-ին կարգ):
- Ֆրանսերենի ուսուցիչ Արմինե Գևորգյանը Լոնդոնում մասնակցում է «Կրթություն բոլորի համար» (Teach For All) ցանցի 48 երկրների ուսուցիչների գլոբալ ֆորումին, ներկայացնում է Հայաստանի կրթական համակարգը և վարում է սեմինար:
- Ս.Պետերբուրգում կայացած «Նոր նյութերի պայթյունային արտադրություն. գիտություն, տեխնոլոգիա, բիզնես և նորարարություն» 14-րդ միջազգային գիտաժողովում ճեմարանի քիմիայի ուսուցիչ, քիմիական գիտությունների թեկնածու Սոֆյա Այդինյանի զեկուցումն արժանանում է հատուկ մրցանակի:
- Կրտսեր դպրոցի համայնքը նշում է Կրտսեր դպրոցի հիմնադրման 20-ամյակը:
- Հայկական մշակույթի օրերը Յուգրայում “Мосты Народной Дружбы” նախագծում նշանակալի գեղարվեստական ներդրման համար Ճեմարանի դիզայներ Սիլվա Հարությունյանն արժանանում է շնորհակալագրի:
- Ճեմարանի 25-րդ շրջանավարտների «Վերջին զանգ» հանդիսությունն է տեղի ունենում:
- 9-րդ դասարանցիները ներկայացնում են իրենց կատարած համայնքային նախագծերը:
- Մեծ շուքով նշվում է կրտսեր դպրոցի հիմնադրման 20-ամյակը. Աշակերտներին ողջունում են կրտսեր դպրոցի բոլոր տնօրենները՝ Տաթևիկ Վաթյան (առաջին տնօրեն), Զարուհի Ղալթախչյան, Տաթևիկ Նալբանդյան, Իրինա Խանամիրյան, Գագիկ Թոռչյան, Անի Հարությունյան, Գայանե Գրիգորյան:
Հունիս
- ՀՀ նախագահի 2018թ կրթական պարգևի մրցանակակիր են դառնում ավագ դպրոցի սաներ Վահագն Ծիրունյանը և Հրայր Ազիզյանը:
- Պուշկինյան միջազգային 13-րդ մրցույթում ճեմարանի ռուսաց լեզվի ուսուցչուհի Մարինա Քոչարյանը հաղթում է և արժանանում դափնեկրի կոչման:
- Դիպլոմային ծրագրի ֆիզիկայի ուսուցիչ, ֆիզմաթ գիտությունների թեկնածու Վահան Հովհաննիսյանը Տրիեստում (Իտալիա)՝ Տեսական ֆիզիկայի միջազգային կենտրոնում (International Centre for Theoretical Physics, Trieste, Italy), մասնակցում է “Advanced Workshop on Nonequilibrium Systems in Physics, Geosciences, and Life Sciences” խորագրով գիտաժողովի:
Հուլիս
- Միջին և ավագ դպրոցների ուսուցիչների, մանակավարժների, տեսուչների մի մեծ խումբ Ծաղկաձորի Գրողների տանը մասնակցում է եռօրյա համագործակցությանը, կազմվում է կրթահամալիրի գործողությունների պլանը, մշակվում են հետազոտության հորիզոնական պլանավորումներ, քննարկվում է ավագ դպրոցի հեղինակային ծրագրում սովորող աշակերտների գնահատման հարցը:
- Ճեմարանի 25-րդ շրջանավարտներին տրվում են ավարտական վկայականներ:
- Դիպլոմային ծրագրում սովորողները ՄԲ գրասենյակից ստանում են արտաքին գնահատման արդյունքները: 12 աշակերտից 11-ը ստանում են ՄԲ վկայականներ:
- Ճեմարանում անցկացվում է սեմինար՝ «Սովորենք միասին, սովորենք միմյանցից». Խորագրով՝ հանրապետության և Արցախի հումանիտար առարկաների մասնագետների համար: Սեմինարը վարում է ՄԲ միջազգային փորձագետ, ուսուցիչներ վերապատրաստող դասընթացավար Սեդա Քոչարյանը (Մոսկվա, 1306 դպրոցի ՄԲ դիպլոմային ծրագրի համակարգող):
- Աշխարհագրության ուսուցիչ Անի Մկրտումյանը մասնակցում է "National Geographic" առցաց սեպտեմբեր "Connecting the Geo-inquiry Process into your teaching practice " վերապատրաստման ծրագրին՝ ստանալով մասնակցության վկայական:
Օգոստոս
- Ֆրանսերենի ուսուցիչ Արմինե Գևորգյանը Երևանում համակարգում է «Քայլ դեպի տուն» ծրագրի կրթական հատվածը. Կազմակերպում է դասավանդող ուսուցիչների աշխատանքը, լեզվական ծրագրերի մշակումը:
- Ճեմարանի ԴԾ տնտեսագիտության ուսուցիչ Արթուր Փոքրիկյանը մասնակցում է սեպտեմբեր 3 Համաշխարհային տնտեսական ֆորումի «Գլոբալ շեյփինգ» տարեկան համաժողովին:
Սեպտեմբեր
- Ֆիզիկայի ուսուցիչ, ֆիզմաթ գիտությունների թեկնածու Վահան Հովհաննիսյանը ՀՀ ԿԳՆ գիտության պետական կոմիտեի «Գիտական և գիտատեխնիկական գործունեության պայմանագրային (թեմատիկ) ֆինանսավորման նպատակով գիտական թեմաների մրցույթ-2018» մրցույթին մասնակցում է և ներկայացնում «Մագնիսական հարթակներ, ջերմային խճճվածություն փուլային անցումները ցածրաչափ սպինային համակարգերում» թեմայով գիտական հոդված և հաղթում։
- Ճեմարանի մի խումբ սաներ և ուսուցիչներ տնօրեն Աշոտ Ալիխանյանի գլխավորությամբ այցելում են Շիրակի դպրանոց՝ տարածքը մաքրելու նպատակով:
- Ռուսաց լեզվի և գրականության ուսուցչուհի Մարինա Քոչարյանը Մոսկվայում մասնակցում է Պուշկինյան մրցույթի ամփոփման աշխատանքներին և ստանում դափնեկրի հավաստագիր:
- Արդեն 7-րդ տարին անընդմեջ ճեմարանի թատերական ստուդիան (ղեկավար՝ Գարիկ Ղազարյան) Մոսկվայի «Կանաչ մոլորակ» միջազգային ֆորումում արժանանում դափնեկրի կոչման: Այս տարվա հաղթանակը գրանցվել է Վիլյամ Սարոյանի «Իմ սիրտը լեռներում է» պիեսի բեմադրությամբ:
- ՀՀ կրթության և գիտության նախարար Արայիկ Հարությունյանն այցելում է Շիրակացու ճեմարան:
- Ճեմարանական պատվիրակությունը՝ ի դեմս տնօրեն Աշոտ Ալիխանյանի, ՌՍ ներկայացուցիչ Իլոնա Հովասափյանի և 5 սաների՝ Սուսաննա Սանդոյան, Անի Թորոսյան, Նարե Բաղդասարյան, Էլլա Խաչատրյան, Լիլիանա Աբրահամյան, մեկնում է Կանադա՝ Օտտավա քաղաքի Ashbury College դպրոց՝ մասնակցելու «Ռաունդ Սքվեր- 2018» միջազգային համաժողովին (RSIC-2018):
- Ճեմարանի մնջախաղի ստուդիայի սաները՝ Արսեն Մուքանյան, Գոհար Ավետիսյան, Տիգրան Զուռնաչյան, Արինե Խանլարի, Վահե Ջրաղացպանյան և ղեկավար՝ Իլոնա Հովասափյանը Մոսկվայի «Կանաչ մոլորակ» («Зеленая планета 2018») միջազգային ֆորումում ըստ Շ.Պերոյի «Կարմիր գլխարկ» բեմադրության արժանանում են դափնեկրի կոչման:
Հոկտեմբեր
- Լույս է տեսնում գիտամեթոդական «Հեռանկար» հանդեսի 2-րդ համարը: Հանդեսում տեղ են գտել ճեմարանի աշխատակիցների գիտական և մեթոդական հոդվածները, որոնք ունեն եռալեզու՝ հայերեն, ռուսերեն, անգլերն սեղմագրեր:
- Վիեննայում տեղի է ունենում Միջազգային բակալավրիատի՝ «Ստեղծարարություն, նորարարություն» խորագիրով համաշխարհային համաժողովը, որին մասնակցում է նաև Շիրակացու ճեմարանը՝ ի դեմս կրթահամալիրի տնօրեն Աշոտ Ալիխանյանի, միջին դպրոցի տնօրեն Տաթևիկ Արզումանյանի և ՄԲ Դիպլոմային ծրագրի համակարգող Աննա Ստեփանյանի:
- Օտար լեզուների ամբիոնի ղեկավար, բանասիրական գիտությունների թեկնածու Էլինա Շաքարյանը Կիրգիզիայի մայրաքաղաք Բիշկեկում մասնակցում է մանկավարժական վարպետանոցի աշխատանքներին, հանդես է գալիս զեկուցումով՝ «Քննադատական և ստեղծագործական մտածողության զարգացումը ռուսաց լեզվի դասերին» թեմայով:
- «Ճեմարանի զարգացման հիմնադրամի» ջանքերով հանդիսավոր պայմաններում բացվում է ճեմարանի գիտական գրադարանը:
- Ճեմարանը հյուրընկալում է Իտալիայի (Վենետիկի Ca'Foscari) և Հունաստանի (Շեֆֆիլդի համալսարանի Սիթի Քոլլեջ միջազգային ֆակուլտետի BA ծրագրեր) համալսարանների ներկայացուցիչներին՝ առաջիկա համագործակցության և սաների ընդունելության հարցերը քննարկելու համար:
- Որպես ՄԲ կրթության ոլորտի ցանցի անդամ և խորհրդանտու՝ Ճեմարանի միջազգային հարցերով փոխտնօրեն, ավագ դպրոցի տնօրեն Տաթևիկ Նալբանդյանը մասնակցում է Նիժնի Նովգորոդի Լոմոնոսովի անվան մասնավոր դպրոցի կրտսեր օղակի գնահատման աշխատաքներին:
- ՏՏ ոլորտում ՀՀ պետական կրթական մրցանակների «Լավագույն աշակերտ» անվանակարգում հաղթող են ճանաչվում ճեմարանի աշակերտներ Հրայր Ազիզյանը և Վահագն Ծիրունյանը: Մրցանակները ՀՀ վարչապետի նստավայրում հանդիսավոր արարողության ժամանակ սաներին է հանձնում վարչապետի պաշտոնակատար Նիկոլ Փաշինյանը:
- Կրթահամալիրի տնօրեն Աշոտ Ալիխանյանը հատուկ հրավերով մեկնում է Ղազախստանի մայրաքաղաք Աստանա՝ մասնակցելու «Նազարբաև ինտելեկտուալ դպրոցներ»-ի կազմակերպած «Նոր սերնդի դպրոց» խորագրով միջազգային համաժողովին:
Նոյեմբեր
- Ճեմարանի գիտամեթոդական կենտրոնի և Երիտասարդ պատմագետների ասոցիացիա ՀԿ-ի՝ «Սովորենք միասին, սովորենք միմյանցից» խորագրով հումանիտար առարկաներ դասավանդողների սեմինար պարապմունքների վերջին փուլն է տեղի ունենում ճեմարանի կոնֆերանսի սրահում: Արցախի, Սևանի, Երևանի հանրակրթական դպրոցների, բուհերի, ինչպես նաև ճեմարանի մի խումբ դասավանդողներ ներկայացնում են իրենց անցկացրած դասերը՝ որպես արձագանք ամռան երկօրյա դասընթացում սովորածի: Ակտիվ մասնակիցները ստանում են հավաստագրեր:
- Ճեմարանը հյուրընկալում է Իսպանիայից ժամանած հյուրերին՝ Մարիա Կալսամիլգիային և Լայա Պեմանին, որոնք աշխարհի՝ Միջազգային բակալավրիատի դպրոցներում իրականացնում են հետազոտություն ոչ կոգնիտիվ հմտությունների զարգացման փորձի ուսումնասիրության հարցով: Ճեմարանը նյուրերին հետաքրքրում է որպես ՄԲ երեք ծագրեր իրականացնող կրթարան:
Դեկտեմբեր
- Կրթահամալիրի տնօրեն Աշոտ Ալիխանյանը Նազարբաևի անվան կրթական հիմնադրամի 20- ամյակի տոնակատարությանը մասնակցելու հատուկ հրավեր է ստանու Ղազախստանի կառավարության կողմից և մեկնում է Ալմա Աթա՝ մասնկացելու հոբելյանական հանդիսություններին:
- Հնդկաստանում ՀՀ դեսպան Արմեն Մարտիրոսյանև և հյուպատոս Գևորգ Հախվերդյանն այցելում են ճեմարան՝ կրթական գործունեությանը ծանոթանալու և հետագա համագործակցության և համատեղ ծրագրեր իրականացնելու հարցերը քննարկելու համար: Դեսպանի նախաձեռնությամբ դեկտեմբերի 7-ին արդեն հեռավար կոնֆերանս էր անցկացվել ճեմարանի և Հնդկաստանի SPRINGDALES New Dehli դպրոցի սաների միջև: